დანართი: ანბანსა ზედა ქმნული ამ წიგნსა შინა წერილნი სახელნი ადგილთა და ქვეყანათა და მეფეთა, გვ. 179-208. - შენიშვნები და ლიტერატურა, გვ. 211-54. - ლექსიკონი, გვ. 256-62. - საძიებლები, 263-325. - დამატება: ვახუშტის გეოგრაფიის გადანაწერები XVIII ს-ის ბოლოსი და XIX ს-ის დასაწყისისა, გვ.227-348.

ი. გრიშაშვილის ბიბლიოთეკა-მუზეუმის კატალოგი.
ფორზაცის მეორე გვერდზე: „ეეე, რედაქტორებო! – თუ „მცხეთობაში“ (მოთხრობა, ნოველა) მოგიყვანიათ, იხ. გვ. 225, მაშინ ჩემმა „თბილისის ბოჰემამ“ რა დააშავა? იხ. გვ. 221“.
შმუცტიტულზე: „ი. გრ. 1941–10/VI“. ქვევით: „ლექსიკონი 256; უცები შეცდომით ხომ არ არის განმარტებული? გვ. 92 ან 261; ყაზალახი, გვ. 261 – გვ. 30, აქვს საიათნოვასაც (აუხსნელი მაქვს) აქაც შეცდომაა; თბილისი, 221; ქართული ანბანი რიცხვებში, 225“.
გვ. 221. ლიტერატურის სიაში ხაზგასმულია: „Кишмишев С. Тифлис сороковых годов к. 1894. 52, 60, 64“. და მიწერილია: „ცალკე წიგნად“.
ბიბლიოგრაფიულ ცნობებში „ტფილისის“ შესახებ დამატების მიზნით მიწერილია: „ი. გრიშაშვილი, „ძვ. თბ. ლიტ.-ბოჰემა“, 1927–1928 წ.“
გვ. 225. ხაზგასმულია: „ს. გლახაშვილი, მცხეთობა ტაძარსა სვეტიცხოველისასა. „საქართველო“, 1908, № 3“ და მიწერილია: „ეს მინიატურაა და აქ რა მოსატანია, მაშინ ჩემმა ბოჰემამ რა დააშავა?“
გვ. 256. ხაზგასმულია: „ბრაზი“, მიწერილია: „რათ უნდა ამას ახსნა?“ სიტყვის ახსნას „ბუგრი-მუწუკი, მსხმო რაიმე“ მიწერილი აქვს: „შიგ მატლი ტილივით, იხ. „ეთერიანი“. ი. გრ.“ სიტყვას „ბალღოჯი – ალუბალი?“ მიწერილი აქვს: „ტყის ალუბალი“.
გვ. 258. ხაზგასმულია: „ლულუფარი – წყლის მცენარე“, მიწერილია: „ლილიფარა – მზესუმზირა“.
გვ. 259. სიტყვას „პუმპულა“ მიწერილი აქვს: „ანუ შამამი, იხ. ჩემი თარგმანი იონათანი „მნათ.“ სიტყვას „როკ-დაქირავებული სპა, ქირა, ჯამაგირი“, მიწერილი აქვს: „როკის სპა, იხ. დავ. აღმაშენებელი“.
გვ. 261. ხაზგასმულია: „უცები – უცოდინარი“, მიწერილია: „შეცდომაა, უცები – ნიშნავს ფიცხელს, უცბადდიდან წარმოებულს ფშავში. უცები ნიშნავს ექსპრომტს, იხ. „ბაჩანა“ – თ. რაზიკაშვილი“. ახსნას: „ქონდაქარი – მკვლელობის მოხელე“ მიწერილი აქვს: „იხ. ჩემი ა. ჭ-ძე“. ხაზგასმულია: „ყაზალახი – კაჭკაჭი?“, მიწერილია: „იხ. საიათნოვა. ი. გრ.“ ახსნას „ჩუგლუგი-საომარი იარაღი“, მიწერილი აქვს „დუგლუგი(?) თოფის ყუა. ი. გრ.“
გვ. 262. სიტყვას „ჭკა-პატარა ჭილყვავი“ მიწერილი აქვს: „როსტოვში ბევრი იცის გაზაფხულს. მე თვით ვნახე. ი. გრ.“ მოხაზულია: „ჯინი-გოდორ-მარხილი“, მიწერილია: „ჯინი – насилка. ი. გრ.“
გაზეთიდან ამონაჭერი ლ. მარუაშვილის წერილი „ვახუშტის გეოგრაფიული თხზულების ახალი გამოცემა“, მინაწერით: „ინდუსტ. ქუთაისი“, 1941, № 100, 29/IV“.